Vybz Kartel and Mavado.

Miss Cherry

Happy New year massive! Mi hope everyting criss and everybody stay focused pon wha dem haffi do fi mek the new year one ah di best. Kaboom, nuh watch nuttin, stay blessed an fi real di fireworks were blazin; Mucho Mucho mi nevah know wi foot wudda survive di shoes and French Connection; Witch, yuh sistah wuss dan yuh wid di mad vibes, Lawd have mercy; TAE mi did start fret say yuh wudda haffi balance di whole ah wi pon yuh back when a five hours and counting inna di spike heel! Yuh a di man fi all seasons a dat mi say! Avah, whe u did deh? Anyway massive, suss time! Link me pon hotgalcherry@hotmail.com.

ODDA STINGERS

Now mi nah address di whole "who win" ting, cause nobaddy nuh win as far as me concern - it did likkle too disorganised. Nex time maybe. Now Killa, yuh nuh realise yuh tun yuhself inna veteran artiste? Yuh ready fi Heineken Startime! Nobaddy nuh bizniz wid yuh again Mr. Yesteryear. Oonu realise a dat happen a Sting right? Mek mi talk di tings! Now Killa decide say him naw tek side and him nuh waah involve inna no clash. Of course, him get boo. You can imagine wen dat deh news reach him Alliance son - who did still deh pon him way - how him start fret? Dem boo him father? So wha unnu expect from him poor son?

TWO-FACED STINGER

Laing, a lucky ting yuh fork out deh hefty sum a money deh pon di son or a wudda Addi against di wind ponstage. Anyway we all know di madness wha gwaan ponstage fi di so-called clash, but when it done an di son go back pon him Gully Side and dem a celebrate, di father come and a gih big hug and congratulations. Mi say, ah shuddah me. Yuh see when mi done cuss him bout him traitor ways it wouldn't nice! Now massive look pon it: di father season inna di clashin ting cause a years him a do it, an him couldn't gih di man some tip because ah him first onstage face-to-face clash? Him come back inna di end when people a say a di gully win? Nah sah!

Merciless

MONSTER STINGER

Mi backfoot! Di funniest part bout di Kippo versus Monster Empire clash ah not even di boo dem wha dem get individually den as a unified body, but a when Ghost an General B a sing and di crowd nearly boo dem long white cloak to shreds and Roun Head juss deh pon "People we love oonu". And so di odda two a sing, so Roun Head a plead an a say "People we love oonu"; mi laugh so till mi couldn't move! Portmore oonu vicious sah! Woi! Den oonu come innah di media a say dem nevah allow oonu fi come pon stage when Kippo a call oonu! So a who di whole a wi stand up roun a VIP a look pon bondage and hassle-free? A nevah oonu?

INVISIBLE STINGER

Now hear mi, how in di name of any decent clash some ting can go so? How oonu have Merciless a clash one invisible force? So mi know di ting nuh organised. Di man come ready fi clash Ninja and den him a hear say Ninja nuh deh ah di venue. Oonu nuh see say a madness dat?

MI WAAH FI KNOW:

Patra nuh know seh when people a clap har, ah nuh summen good? Wha she a say "thank you" fah? Mi backfoot.

A wha do the two artistes dem gone dung a Campfire a create fuss?

Patra

Busy how yuh nevah deh pon Sting? Nobaddy nuh waah clash yuh babes. Yuh build yuh career wid a roof, and it hit it!

How di police nuh have no decent lead pon Ice death. When ah di funeral? It hurt mi heart!! Jah know, mi not even waah talk bout it yet.

Latah massive.

Bounty Killer