Spragga Benz - file photos

What a gwaan massive? Happy birthdaaaay toooo meeee! Lucea here we come! A dung deh we say tonight at Club 300 wid Freddie, Chino, Shema, Anthony Cruz, Tellah, To-Isis, the Magnum girls and more fi di McGregor family autograph signing party. And a mi birthday so mi jus a go chill out dung deh wid mi husband and tek een some vibes. Zeen? Bagga, Skeptic and di whole a oonu dung deh big up oonuself! Massive link me pon hotgalcherry@hotmail.com.

WHAT A DRAMA!

What a ting doh eeh? After di big war 'bout who tighter dan who and who can clap it een more fi tek a nex gal man, see it deh, di man tun pan har too. Truss mi, mi nuh know wha fi say, 'cause when di big drama did tek place wid she and di coolie bwoy baby modda, people did start talk say dem nuh know why she a fight ovah him 'cause him pop dung, and buy and sell two ole car nuh mek him a car salesman muchless smaddy fi say him have a profession.

Den dem a say him did only want har 'cause she a artiste and fi di hype. Den loeth and beholdeth, aftah dat story start circulate again say him a deh wid some a har female fren dem. Sherlock di Worl' Lock oonu know wha mi a talk 'bout right? Den loeth and beholdeth yet again one new drama when di baby modda did start say if a so him want di artiste, why him still a call har a night time and talk 'bout him still love har?

Den recently dem a say ah one big fight pop so wha she still a do wid dat deh tuffengeh deh? A sign yaw man! Now 'bout she and Addi? A wha so? Bwoy, dat wudda be a serious relationship! 'Cause mi cyan imagine dem war deh wha wudda buss!

FULL TIME NOW!!

Mi say mi nuh know if mi fi laugh or bawl! Wha mek di light bill cyan pay all now?

Dem haffi a work ah night like ah dem deh pon 'Famous Vampire' timesheet: Dracula? "Heeere sir!" Vlad the Impaler? "Heeere sir" Duppy Rat Bat? "Heeere, mi juss haffi done write deh verse yah".

Nah sah, sort out yuhself 'cause it nuh look right! Den fi mek tings wuss, mi understand say yuh have a gambling addiction, so a deh so di money a go mek yuh nah pay yuh bills dem.

It ah affect everybody round deh 'cause dem cyan duh nutten a day when di light people a roam di streets, a haffi night. Den fi mek it wuss yuh actually borrow money from di two deejay dem who definitely have a rage problem! Get yuh ting sort out, please. Come on, how yuh a go get back one uptown groupie like di one yuh did deh wid? Heh hey!

WHA CUBA AH SAY

Mi get one email from one a wi Jamaican dem name 'Craig Fashion' and living in Cuba and di man a big up some people but apart from dat him concerned bout wha deh happen inna di music and di levels wha it a reach. More time dem skirmish artiste yah tink say a juss we inna Jamaica a tell dem fi ease dung; but di whole worl a watch - obviously.

"I read your article every Friday when I am at work. I work here in Guantanamo Bay, Cuba, with the US Navy Exchange. Mi love how yu keep the business real and propa. Jus want you big up my kru FASHION ICONZ FRATERNITY....Jus want you know mi woulda love fi see the artist dem balance back the industry and go easy with the hate vibez...cause it nuh really healthy for the younger generation....cause you watch the kidz live what they learn right...Big up alliance, big up mi dancer Craigy Dread and Ding Dong and my kru, Fashion Iconz fraternity and DJ Rakeem and DJ Mo-fashion, big up Reggae Boyz 2014 we can strive for anything. Jus live up and the Bejing team...mad respect. Big up yu self Cherry, Craig fashion."

COBRA CORRECT INDEED

Mad Cobra

Cobra yuh right my yute bout how some a dem people yah inna di music unprofessional and fi evah a bom rush di stage an wi cyan get a decent performance outta some a dem artiste yah aftah we pay wi hard-earned money. But lookyah now yuh see deh point deh yuh mek bout dem muss cut dung pon di amount ah crime an murder dem show pon news more time - ah TRUE!

Nuff ah oonu know wha a happen inna garrison enuh an more time ah so dem man deh who a commit crime pree: "Yeh see mi ting deh enuh! Ah me do dat enuh!" A serious ting. Ah di same way when di ress a we do summen decent an TV deh deh, we a look fi see weself and we feel good! Ah di same ting. More time some crime juss commit fi get a reaction and fi mek a man feel good say a dem mash a works and if it good enough fi mek TV. Mi nuh know how dem a go sort it out, but some tings and crime scene can cut dung and dat's a fact.

Massive, tek care and mi waah see mi Lucea people dem latah! Spragga, "slowly but surely" we say!