Dr Kingsley "Ragashanti' Stewart - Winston Sill

What a gwaan massive? Oonu good? Mi hope so! My week did alright, nuh too stressful cause di amount a joke me get, deh week yah, nearly mek mi get asthma attack! Before me figget, happy birthday Mucho Mucho (23rd), Kaboom (24th), Nikki Z (24th), and meeeee (28th)!! Now, look here, Lucea massive yuh see di Freddie and Big Ship autograph signing next week, Friday di 28th, inna Club 300 a deh so mi a come celebrate mi birthday and tek een some vibes wid di ress a STAR massive. Chino, Freddie, Stephen, Shema oonu big up oonself oonu large!!! Nikki ah Beach Sexy wi say tomorrow enuh! Massive, link me pon

hotgalcherry@hotmail.com

BROKEN BUT NOT OUT

But, Raga what a ting reach yuh eeh? Mi say when mi hear say yuh inna accident mi frighten so till!! But when Kaboom call me back and say she talk to you and loeth and beholdeth, Raga, when she start tell di story (babes mi love yuh and everything but) mi did haffi laugh! Now, babes how you one manage fi drop eena bathroom and bruk yuh hand inna FIVE places? Nah sah! Dat serious! And haffi do surgery? Mi frighten! Likkle mos' yuh bathroom wudda caution tape off juss so! Mi say you and Mucho Mucho muss related! Di mos' unbelievable happenstance dem always a reach oonu! Babes, mi sorry fi hear tho, if mi nevah married and Sadie nevah inna di pictuh mi cudda come tek care ah yuh and all dem strong, muscular, tall, dark, chiselled ... oh sorry, mi a get carried away!

Alright massive, ah nuh Tony mi a talk bout, dis a one nex Mentally Ill. Ah nuh me say so, ah so him declare! Now Kaboom and Japanese say dem deh a Lucea inna one meeting wid Bagga and Sala, dung a Club 300 wha day yah, a finalise some tings fi di billboards and posters fi next week Friday wid Big Ship and loeth and beholdeth Mentally Ill buss een a cuss wid one piece a toilet paper roll up inna him nosehole. So, Japanese say she frighten an a wonder a wha di backfoot a happen. Anyway, Mentally Ill start cuss say him hear say Freddie a come dung deh and him want a buss cause a EIGHT time now him a go a mad house and tings nah go right fi him. Him a cuss say a obeah dem obeah him cause him buss one man pipe and from him buss di pipe him nuh stop mad. So, Bagga ask Mentally Ill whaapen to di ting dem him a smoke an if ah nuh season it get, and if dat nuh have nuttin fi do wid it. Mentall Ill say NO! Ah obeah dem obeah him an him a try buss from when and di obeah all start mek him teeth a drop outta him head.

SANTA CRUZ, FREDDIE, BABA AND MORE

Freddie McGregor

Freddie, mi hear say yuh go walk di streets dung a Santa Cruz when yuh go dung deh cause some people nevah believe say a so wi serious when wi say THEEE Freddie McGregor a come! Mi rate wha yuh do nuh backfoot! 11 at night? Mi nuh know how much artistes wudda do dat juss fi cure disbelief! Mi cyaan promise nobaddy say mi wudda do it neidah. When mi tink bout mi hair a wet up wid night dew? Nah sah. Mi wudden even ask bout Mucho Mucho, she wudda suck fi har teeth. Witch wudda say fi har favourite ting: "Can we leave now please?". TAE wudda wussarah say: "Doooon't be stupid!". Lawd have mercy, Miss Kaboom wudda haffi get push roun di town inna wheel barrow, trolley, skateboard or summen, but put one foot infront ah di oddah? Heh Hey!

Freddie yuh sell off! But it show di problem inna di rural area when people do a bag a fake advertisement and obviously no artiste who advertise no turn out. Furthermore, dem ting deh a di reason some artiste and dem skirmish team nuh understand say dem cyan sign on fi do summen and den call it off di evening before. Dem put di brand and company dem reputation at risk! So big up yuhself. Mr. Baba Roots and family tanx fi tek care a Kaboom when di ONE Magnum lick har and she sleep tru di whole promotion. (Freddie say, "Oh God".) Kaboom say she nuh memba one a yuh likkle daughter name, but a di one who wouldn't stop wave when she a lef di nex morning. So Kaboom wave, so she wave, and a so dem a gwaan. She say a har likkle sister, so bless up.

Mi waah fi know:

☛ Dem cyan stop use da female video director deh? Mi know she aligned to oonu camp an all dat but, lawd man! She need some original concepts! Low har mek she develop or summen yah man. She need a mentor.

☛ Dem two artiste de really deh? Dem a try hide it from long time but di rumour dem nah stop! To mek tings wuss, di female DJ go a New York wid har DJ "fren" and fi him baby modda start step to di fluffy artiste and hype pon har! Mi say one saga! Baby modda or not, she did haffi find har yard when di DJ push har outta di venue! Bwoy, an look how di baby modda use to treat di designer an a hype and send myspace message like a she name Tom! Ah bwoy!

Alright massive, mi gone and nexx week mi show oonu deh pictuh deh mi promise oonu. Mi nuh figget, but no more space nuh lef! Latah!