Kahlil cozies up to Tami Chynn (centre) and host Kiki, ( second right) while Tarrus Riley (third lef t) looks on during the airing of the Digicel Rising Stars competition held at the Courtleigh Auditorium last Sunday.

People, seriously, a wha really gwaan Friday night? Mi did a tink seh a mi tv trip out, an mi a hear strange tings, cause mi couldn't believe seh good, good K'Alee get vote off and SLR still lef. Look ya nuh Digicel, unnu need fi bring in a ting whe mi spen mi money fi vote OFF people. If a dat did a gwaan, unnu woulda get crazy vote and mek mad money. But, moving on ...

Di show large yah now!

Lawd of mercy massive, what a show. mi seh, a di best inna di whole season! Mi scream so till mi nearly dead!. Cameal and Kahlil, unnu large! Others .. well .. uhm .. yah. Mi seh, when mi see Mavado tek di stage mi nearly drop outta mi seat. Big, big Mavado deh pon Rising Stars. di show buss!

Back up, back out

Anthony, mi bredrin, yuh tek di word right outta mi mouth Sunday! When mi hear SLR come out and sing wid Romain, mi nearly dead, dem a real back up! An', di worse part is dem really a sing out dem soul case, an it still neva mek. Romain, yu vocals large, dem jus couldn't keep up.

Save unnu lunch money

Next ting, mi a get fi undastan seh a Frome and Ruseas a keep SLR inna di ting. A wha really do dem schoolaz yah? Fi di sake a humanity, mi hearing and mi TV, please, save unnu lunch money an stop di foolishness. But, what a ataclapse if dem end up win? Woi .. trus mi, big riot woulda gwaan.

But, more pan dat, di people dem neva tek too kindly to di news Friday still. Mi hear seh di people dem out fi one a di judge dem, cause dem seh a him mek di 'mannequin' dem still inna di competition. Unnu remember when Secret Melodies lef? Di people seh if him did vote di next way, wi wouldn't inna dem problem yah.

Have mercy pon mi ears

Girl group SLR sings with 2007 Digicel Rising Stars winner Romain Virgo.

Mi seh, mi nuh kno wha get inna di audience last Sunday, everybody feel seh dem a singer. Yendi a sing inna di break dem. Den one nedda lady a sing inna di break a disturb people and, when mi go outta door fi escape di assault, one boy group out deh a sing like a auditions a gwaan.

Story come to bump!

Wayne Marshall and Tami Chynn.

Love is in di air! Fuss, it look like seh my girl deh love off Tarrus an a bere flirting inna di chill room wid Kahlil, Tami and Kiki. Den, di likkle time Tami deh back pan di rock, Wayne Marshall end up a Rising Stars. Wha unnu seh? Di hiding dun now?

Wen u have a likkle free time pan u hand, wa better fi do dan come tek in a Rising Stars show, nuh true? It look like a dat my fren deh did a tink cause tru she nuh have much a do dese days. Mi see har zip in a di auditorium come tek a look. But .. mi see seh u choose a night when u special, so special, so special, so special 'fren' pass thru too. Wha yu seh? A jus buck up? Hmm....

Di great escape

Big artiste, mi realise seh yu haffi tek whe yu self quick, quick, before dem loose di crowd pan yu. Mi hear seh u mek it to di range in 10 seconds flat!

Next week!!!

Mavado performs with Kahlil.