Again! Mi say whaapen to dem?! It's Cherry again! Big up mi family, ma fans an ma frens! Hear mi nuh, ah juss di way wi grow, we naw truss muh bwoy wi nuh know.

Dem waah fi break yuh vibes an cyan stop yuh show! Dem too bad mind! Dem nevah stop mi doh! What a gwaan massive? Deh week yah never too bad at all despite some a di bad mind crosses dem! But pon anodda note, Spragga babes, mi cudden bring mi self fi come a Carly funeral; mi cyan tek di sadness Jah know. Bless up to you and yuh entire family. Ress a massive, Carol Dunkley (Butterfli Wings Org., NY); Mike Bolan (USA), Marlon Stewart (and di whole Headbang family); Charmaine (UK); Janice (NY); Kaboom, Nikki Z, Mucho Mucho, Princess Suss, Witch, TAE and di ress a mi INK family, we unstoppable deh year yah! Ress a massive, link me pon hotgalcherry@hotmail.com.

INDEFINITELY? WHA DAT MEAN?

Nikki yuh muss know say mi a go tackle your ting first! Suspended from one week to indefinitely? So yuh cuddah siddung a yuh yard fi all three month an mek we subjected to some boring forces? No sah dat nah go wuk at all! D'Adra oonu ratings fi deh segment deh nuh start drop yet? Hear wha mi a say, mi rate Sparks like crazy, but it come een like when Free an AJ get drop from 106 n Park - ah juss nuh di same vibe. Wha oonu a go do? Liquid have di number one slot an Nikki have di number two inna di ratings poll pon di station, so how long dis a go continue an oonu still have hopes of rankin second again inna radio polls? Stop di madness. Two week enuf, cause di Lord forbid Sparks go tek sick an wi subjected to deh one deh wid di not-so-rosey accent who nuh stop annoy wi wid har di Jamaican J-Lo comment every time she a introduce one Kris Kelly track! Summen wrong wid har or wha? Radio heads sort out oonu self yaw man!

BUTTU INNA BENZ AH STILL BUTTU

Ah wha tek deh brand manager deh? Yuh nuh betta dan some a dem ediat swing pon pole crebbe gyal? Why oonu cyan keep oonu private life deh way deh? Every whe yuh go yuh haffi a lay dung inna bed an tek pictuh a who yuh a kiss? Yuh a bed and photo flash tester? Mi say when mi show Peaches di pictuh dem fi ask if a really you, she shame cyan done. She a say she nuh know how she nuh have a permanent frowsy face look when she see yuh inna di office a gwaan uppity. Mi granny wudda say yuh inna too much GLEE. Slow dung! Yuh young, di ting wha yuh a oversee wussah young an really nah do too well wid promotion neider. Yuh realise say unlike everybody else a juss one ting yuh get fi focus pon an it still naw mek no headway? Dem unnecessary ting yah wha yuh a do wid yuh life mek it seem like yuh unfocussed an giddy. Dash whe di glee; young nuh mean foolish!

GLEEFUL+HYPE= STUCK PON GULLY BANK

But a cudda wha tek some a dem artiste deh gone a di people dem foreign show an waah bad up promoter fi more money dan wha dem when deh offer Chris Brown? Promoter, a so oonu desperate fi artiste? Gleefully Hype yute, nuh di fuss serious show yuh get inna one long time? Wha yuh a hype bout US$200 gran or nutten?! A sign yaw man! If Chris naw watch no face an settle fi US$100 gran, who you be?

Five a yuh CD dem sell a foreign? It mek it pon number one pon di ALBUM chart nowhe but inna yuh mind? Ah whaapen to dem gleeful artiste yah man? Dats why no matter how some a dem a prosper dem fi eva stuck dung inna gully garbage, fate haffi always a tek dem dung a notch or two every month!

Massive, mi gone, but mi haffi do a separate big up to some a di artiste dem mi a pree an like wha gwaan. A mi likkle REVIEW section: Rain di song wid you an Serani have a nice R&B vibe!! Sell off! BUT, di next song wha yuh video, yuh need some work pon yuh clarity ‹ mi cyan hear wha yuh say, and di concept fi di video weak. When woman a lef man wi nuh have time fi a write and decorate leaving poster fi paste pon door an waste we good lipstick inna mirror. When wi frass an a lef man, wi FRASS an naw tink. No time fi a plan out decorations! Plus Julia miss di most important ting: inna di video wid yuh a lef a man of how much years, oonu cudden find a man fi play di part? Oonu cudden find a pictuh of a man fi zoom in pon wid yuh a reminisce? One whe yuh start tear up after an fling pon grung? Because a dat, we cudden connect wid di concept, it juss out deh a swirl inna di wind. Irrespective of dat, yuh a gwaan.