Cameal Davis - Contributed

SLR - Contributed

Yes mi people, how unnu love wha gwaan last week Friday night? Mi nah go lie, di judge dem feel like a di wrong decision, but mi love it. Dats why mi haffi love Anthony so. As di man seh, people haffi can like yu, big voice a jus part a di ting. Anyway, mek mi get to it.

Stampede fi si di 'stars'

Mi seh, if unnu did see di crowd Sunday nite, unnu woulda swear seh a Celine Dion a perform! A how so much people get ticket? Mi a get fi undastan seh di crew have fi dem owna VIP list an nuff a di people dem who get dem rightful ticket cyaan even get fi go in.

It look like sum a di people dem get vex and jus buss a big stampede a di door. Dem haffi lock di door pon dem an it tek whola two security guard and di crew fi get di door lock! Mi laugh till mi nearly dead! A dat happen when show overbook. Is a good ting seh mi nuh go nowhe unless mi a VIP cause mi nuh push nor shove.

Shut Yuh ... !

Mi seh mi neva see a set a people can chat so! All when di judge dem a talk, dem haffi deh tell people fi hush up. Mi know seh unnu excited, but unnu fi memba seh di sinting live an unnu cyaan gwaan so.

Wha mek some people bad mind so? Mi seh when Cameal a tek it to dem, yu have some bad bruck people a send out bere boo. Why unnu stay so? Even when di judge dem a praise har dem still a boo! A wah, tru di girl a Denham Town royalty? Anyway, go tru my girl, dem cyaan stop yu! All di crew love yuh, yuh shoulda see dem a dance to yuh 'Spotlight' song.

Show the real host

Yendi Phillipps - File

Yendi Yendi Yendi... yuh need fi tell di people fi stap sabotage yuh script. Mi seh mi wish unnu coulda see har off camera, di girl vibesy! She know all di regulars by name, she a tease people an all have har likkle rising stars boyfren. An dem nah capture di girl good inna di fool fool script. Nuh worry yah mi fren, next year mi wi apply fi write fi yuh.

Backup fi wah?

Di back up singers dem vibesy and can sing good, but mi nuh see why SLR need back up. A whola three a dem inna di group, dem can more dan back up dem one anedda. Unnu need one good lead singer, not three alrightish one. Unnu need fi watch Dream Girls and tek a note from Beyonce, there can only be one lead!

Anyway, nex week!!!