Empress - file
What a gwaan massive? Cherry Flawless in di building! Oonu good? Mi say what a way Gustav try mash we up? Is like it nevah waah lef or some ting! But fi all who get affected wicked, mi sorry fi hear. Jah know. And look here Spragga baby, mi vex yuh fret bout Carlos. Look how dem a gwaan like dem waah tek it pon a nex level when all we want a some justice? An lookyah deh termite reader deh wha lef comment pon Allhiphop, wha yuh mean why it mek news when a next rapper loss nevah did?Not true! Gweh! Kaboom, Kathy, Illseed an di whole Allhiphop, blessings
Massive oonu link me pon hotgalcherry@hotmail.com. Suss time!
WHA DIS MI HEAR BOUT ROUN DI REAR?
My girl! A wha di backfoot dis mi a hear? One sex tape? Wha yuh mean fi really come pon tape a talk bout di man, who are not your bonifide man, muss give it to yuh roun deh? Is a joke or wha? Lawd gawd! Mi say when Candy tell mi, mi nearly pass out like weak heart Mavis! Den of course, mi did haffi tell Kaboom and Mucho Mucho! None a wi cyan believe! Kaboom a tek up fi yuh an say all doh yuh a beg fi deh ting deh pon di tape, di way how yuh back part sort out, wi cyan really tell; so maybe yuh juss a say so, but a nuh really deh so di man did a go. Have mercy!
A whe deh happen wid dem gal yah inna di media doh gawd?! How di big media house a go tek deh news yah? Babes, den fi mek tings wuss, di bwoy who have di tape an a blackmail yuh, yuh really go pay him $100 grand? Yuh have money fi waste or wha? Yuh nuh tink say him a go continue call yuh fi money like how yuh fork out so much deh time deh? Now yuh cant even go police go report di bwoy cause yuh a facilitate di extortion, not to mention yuh a try covah it up cause yuh nuh want dem facts deh a come out inna court. Den smaddy are tell one of my INK smaddy, who tell me back say, one rumour a go roun say yuh bonifide man are swing di nedder way. So wha mi a conclude, is dat, dis ting whe yuh a ask di next man fi do to yuh, is maybe some ting yuh used to from yuh swinger man? Save dem Father! Hashkalabish matasatagishulamba!
ELEPHANT PUSHING DI RANGE?
Elephant Man - File
Yoooow! Elephant Man yuh sample nuh backfoot! Yuh nuh know when people a pop style an say, Ma homeboy be pushing tha Range, dem nuh mean it literally? Yuh see how knowledge is power? Look wha yuh mek reach yuh di odda day. How yuh fi have big Range Rover an a drive tru New Kingston an it pop dung inna boilin sun hot? Juss sudden so? Juss so-so so? Is a Macka Diamond Done Already remix video oonu when deh film? It nuh look proppa mi dupes. Di way how people frighten dem all stop fi video tape di destruction wuss dan Gustav! No man! You an Lena British cyan do oonu Range Rover link up party like wha oonu when deh plan? Lena yuh cyan have dem Range deh wha nuh fit fi di drive-more-dan-5-mile-range inna yuh league! Ele, juss go buy one Mini Coupe yaw man; dem easier fi push.
NO MONEY FI SPEN!
Massive, mi juss nuh know wha deh happen inna di worlÕÉmi juss nuh know. Couple weeks ago mi mek mi talk bout di so-called Christian deejay who nuh ramp fi go foreign and tek up US$100 offering per person inna church once him sing some ting. Smaddy a mek mi know say yuh have some church heathen who mek it official an mek sure say people nuh have no excuse fi nuh drop di ÔHoly moneyÕ ‹ so dem install one bank machine inna di church yard! Mi nevah hear such a ting inna all of mi life! Mi need fi go deh church deh fi dem understand wha Ôbruk pocketÕ and Ôcome juss as you areÕ really mean! Yuh see when I done holler bout di damnation an destruction wha go come dung pon dem if dem nuh low mi fi worship di Father fi free, dem wudda undastan demself! Disgusting set!
DI ZEBRA SOON FREE FI ROAM
Zebra, mi happy fi yuhÉagain. Mi nuh know wha fi sayÉagain. Is like yuh mek a living out ah goin to jail! Dem a pay yuh? Mi nevah see dis yet. Is like yuh a run competition wid DMX to backfoot. But wha deh talk deh yuh mek bout some people only go put 5 star pon dem shoulder an a nevah di public call dem so? What a way yuh a hint bout Leftside an Kippo song wha dem soun like you an Tiger eeh; say it look like dem happy fi see yuh state? Yuh full a drama sah!
Mi Waah Fi Know:
Empress yuh cyan calm yuh likkle self when yuh go out? Di odda night when Chino, Queen Ifrica and di ress a perform a Sex In Di City, yuh cudden siddung fi we enjoy di bloomin show? Wha yuh tek wi cameraman camera an a do? Siddung sometime man. Now see it deh! Yuh get pon we nerves again. An nuh vex, cause if yuh nevah put on leather yuh wudden know say it pinch!
Ah wha do all dem deh a come pon radio say dem a empathize wid Spragga? Empathize, yes, but yuh still nuh know how fi yuh own dead. A wha di backfoot do some a dem media hungry people yah man?
Massive mi gone! An lookyah Raga, juss try know say mi serious say mi want mi one dance dis Saturday ah yuh party! Or else!
Do
you have a problem? Is something bothering
you? Write to