Rising Stars results show, Friday September 15, 2006, TVJ studios. - Colin Hamilton

Bwoy oh bwoy, what a way mi haffi cuss uno eeh, just fi uno mek di right decision. If me neva say nothing, ah so uno woulddah have me a listen to di rat-voice pickney fi anodda week? Bwoy, Jamaican people wicked fi true, but me glad uno have me fi guide uno. Just call me 'Mosesina.'

........................

Di next ting wha a perturb me now is dat, uno a stress out Mosesina from di start: how many people must I lead from the dark land to di light? Now Mr. Christopher, how yuh fi go a di people dem rightid football match and nuh know di second verse fi di National Anthem? Yuh know bout di second part, by di way?

A nuff question mi have fi yuh, because a tings like dat mek uppity people feel say singer and deejay nuh know nuttin bout nuttin. Hear mi now: A pon spot dem ask yuh fi sing di song? Yuh neva get no time fi prepare? Yuh neva know say yuh nuh know di song fi yuh country before yuh go, so yuh coulddah swat it? Mi ratings fi yuh drop big time cause apart from man who can sing, me love man who tek initiative and have wisdom! Hot body naw do it again.

.........................

Now back to dis yah year people dem. Inga yuh gone, but yuh and yuh man hot pon di scene eeh? Mi neva know say a whitey yuh love? Him nuh look tree bad doe and what a way him naw lef yuh side eeh, all a hold hand all di way to di criss vehicle. Lawks, pop style pon dem yaw, cause me hear nuff a dem a laugh laugh bout yuh whitey. whe fi dem man deh? Nuff a dem nuh have neither black nor white.

........................

Now a who mi hear di weave head, stretch-mark s'maddy deh a class as 'whore' a di people dem good good show? A cyaan mi good-good songstress? This a di problem wha me have wid certain class a people when dem go a decent place you know. dem nuh know how or when fi lef di classlessness outta door! Wha you know bout di woman pickney, so till yuh mek di modda haffi tun back round an class you back to? Classless!

..........................

Now Miss One Third sister, wha mek you one can chat so much? Why why why? Fi di whole a di competition yuh mek di people dem waa ban you and yuh loud mouth from the studio ... why? Imagine, yuh mek dem all a say yuh worse dan Noddy loud- mouth sister! What a distress, yuh know say things bad. Yuh fi tone it dung likkle bit man. Cheer and clap, but nuh ova di speaker dem, babes.

....................................

Now fi you Miss Nadine, how yuh fi go call good- good Nickiesha, "Nicole?" Who name so? If s'maddy did even inna di competition wha name so, it wouldn't so bad. But lo and behold yuh buss out wid a duppy name and you a di ongle one wha nuh realise! Yuh mek JH lick him forehead till me seh some brain damage muss happen from dem lick of distress deh! Why Nadine, why?

...................................

By di way people, how uno fi a have Rising Stars concert show wid everybody but Candy? We waah see har too yuh know! A did di ongle hot deejay pon di show and she neva fight off nobaddy fi get ratings eeda. Uno need fi do betta dan dat man, and den a talk bout say she nuh important fi di show! What a set ah rubbish people! Uno can gwaan, cause so-so gravy cyan full belly.

...............................

People mi gone yaw man and uno vote anyway uno please cause deh one deh gone and whoeva win deserve it. Latah!