Entertainment

Nadine bun a fiya pon dem

A contestant in the Rising Stars competition performs at the auditions held in Black River, St. Elizabeth, last weekend. - Claudine Housen

NOW NUFF PEOPLE ave it seh Nadine Sutherland sawf, from las year pon Rising Star. An fi tell yuh di trute, she kina like too much tings, an yuh cyan see seh she a try be nice, unlike di one Anthony im.

But yuh cyaa fight gainst Anthony becaw somebody need fi tell some a dem people ya fi go back a dem yard. All one likkle pineapple head bredda turn up wid one piece a tone-deafness. Is weh him did tink im was goin.

Nice one

So, anyway, Nadine she a di nice one a di group but one bredda bring out ar wrag side dung a St. Elizabeth deh mi seh. Di bredda claim seh im a sing bout ow it wrang fi deh wid school girl, but ow im a gwaan bout di young girl dem bres, Nadine stap di bredda eena im tracks an seh she naw put up wid dem pedafile ting deh.

Well she mighta love nuff tings but at least fi di first time Nadine show seh she a no nobady pappy show.

One next bredda, one rasta man an im empress, come close to it again. Di bredda, Jah Pure come up wid im Empress as im flag waver. But di people dem stap im cause dem seh dem no undastan what di ooman was doin pon di stage, cause well she did really a wave di flag fenke-fenke.

'Ear Anthony im "It would be more respectful of the Empress if di Empress was a more integral part." It seem seh di judge dem neva like ow di ooman did look like seh she a di man prekeh.

All mi affi seh is gwaan bun a fiya pon dem Nadine. Is wha dem tek ooman an young girl fa?