WELL IF YOU nuh go see One Love yet, mi nuh know weh yuh a wait pan. A bet if it was one a dem shat up-shat up movie you woulda deh deh pan yuh aise. Well go watch da one ya an buss two big laugh.
Anyway, Keisha go watch it an she love it. Now mi neva did expect nutten else cause a big writer like Trevor Rhone (weh write Smile Orange did a deal wid it case so mi did expec' it fi funny.
Mi neva know wha fi expec fram Ky-mani Marley im caa mi ongle know bout im causa im fadda name (but if me did name Marley - nobady couldn' chat to me, so mi nuh ole it 'gains im). Well im neva too bad. If im plan fi falla up dis actin ting im need fi tek some lessons but im coulda work wid.
Ky-mani im play one dread name Kassa who wan mek a buss. Unlike some a dem dj outa road weh a mark up dem name pon everyting, im ave likkle talent so im nat destined to be a iron balloon. When im an im band ear bout one big competition (yuh know like ow Popular Song Contest used to big) dem tink seh a fi dem chance dat.
Rosemantic side
It look like seh di video light neva ready fi dem yet cause di promoter a di show, Selecta G, decide fi double crass dem. Winston 'Bello' Bell im play Selecta G, an mi a tell yuh seh di man do a wicked jab. Man di fuss time yuh see Selecta G im lay dung eena one pool. Yuh wan see belly. Fi im dacta mussi tell im fi watch im weight suh im tek di whole a it put in front a im. Im lay dung pon one a dem floaty-floaty suppen, but wid dat deh belly im couldn' sink.
Now One Love ave a likkle rosemantic side to it. Cherine Anderson she a di next star, yuh might memba ar from Dancehall Queen - she did play di dawta. Inna One Love she a one Penticostal girl name Serena. So yuh know seh Penticostal an Rasta is nat a pair made in heaven. Anyway, she an Kassa nuh decide seh dem in love.
Now Cherine neva do a bad jab eida, dough she coulda use some work to. Mi jus ave two question fi ask bout ar. Mi know seh she name Serena, an she suppose to be 'seren' but lawd man, she coulda put likkle life eena di character. She jus deady-deady so. Di next ting is, Is which Penticostal people dem know wear afro? Fi dem church mussi well libral.
More talented
Winston Stona play Serena fada, an mi a seh im gwaan good. Di man strict so tell strick a ask im what's di matter. Im a one a dem pastor deh weh nuh fraid fi read yuh outa church. Man if im did a fimmi fadda mi oulda mus run weh.
Everybady shoulda know by now dat Christopher Daley no too righted. Daley im a one a di man dem inna Kassa band, an im elp nice up di movie. Im more talented dan people tink yuh know. One man cyaa so fool, so a muss act im a act.
All Mutabaruka een deh, and di one Michael Holgate look like seh im watch two Capleton video before im play da part deh.
Now One Love funny, but fi tell yuh di chute di real star a di show a Jamaica. Mi woulda move go da Jamaica deh right now. Is like one Touris Board ad widout di whole eap a white people dem a run roun di place an a grin aff dem teeth. Mi cyaa believe seh a place like dat people a run lef ah country come chuck-up chuck-up a town.
So like mi seh, if yuh no see it yet, go watch it. Di movie funny and it pretty cyaa done. Mi ongle ope seh when you go di man dem won' lack di curtain an start back di movie, like dem did do when me go. Yuh eva wanda ef a sleep dem people a Carib a sleep yet?
