PEOPLE, AS I write this Suss, a certain bad mind editor a come tell me seh im nah carry my tings - unnu see all di tings I have to put up wid just to give unnu di real news! Misseh, from Miss Cherry step up inna life, dem just a try fight har down - a wha suh! Anyways a just one ting me waan tell di fighter dem, mi nuh fraid fi di coming of man but di coming of God! Oh! Bright!
A what a gwaan a court.
Buju, mi bex. How dem fi find yuh guilty, all afta di police abuse di engineer? How yuh guilty and dem nuh have no right fi deh pon yuh property? How dem find yuh guilty and ah come talk bout your 'demeanour in court'? No sah - mi nuh feel right bout dat!
But Buju gwaan hold di fait', Miss Cherry is your biggest fan, from 1991 when me decide seh we was going to married, a jus cause right yah now, mi cyaan handle rasta living, whe mek wi nuh walk down the aisle!
Yeah, Miss Cherry ah Buju groupie - so what! Some a unnu ah LA Lewis gyal!
SAW, MI NEVER LIKE IT NEITHER
Saw, yuh foot did look well dry and scaly scaly inna di Vibe, dem coulda well an airbrush it. When dem done airbrush Little Kim and dem odda hos. But yuh ratings still deh deh yah my girl.
CE'CILE YUH DID LOOK GOOD
CE'CILE YOUR PICTURE did look good inna di Vibe though. Yuh head never look suh big.
SPLISH SPLASH
HEAR DIS NOW. Monday afternoon at the other paper, and is not XNEWS one a di editor dem guh look pon a guy and tell him seh, him shirt nuh look work appropriate. People, unnu know wha di yute do? Him dash water pon di editor! Mi seh murder! A eediat ting dat yute!
JUDGEMENT WILL COME!
BOSS MAN, STOP it. Yuh mus' stop feel up di likkle girl dem inna yuh office. Di staff is talking and dem not happy. Dem seh every girl whe come, you want. Dat nuh right! It nuh look good, and yuh wife know. Yuh nuh want har divorce yuh, cause yuh a guh suck salt.
Mi done. Next week!
