Entertainment

WWW.STARSUSS.COM

HAPPY, HAPPY, HAPPY New Year! I wish for all of you a glorious, joyful, wonderful 2004 - yeah mi still a likkle drunk offa di New Year partying.

But seriously Jamaica, mi want better fi we dis yah year. Mi tired ah di foolishness, di killing, and di fight gainst ting. But anyways unnu come yah fi di suss, mek mi gi unnu di talk!

Vybz Kartel

JAH KNOW MI feel sorry fi Kartel! Imagine most a wi ring in di New Year wid wi family and fren dem, and him inna jail cell. To rhatid, mi know seh if him coulda tek back di whole a wha did gwaan a Sting, him woulda do it. My yute mussi inna him cell a sing R. Kelly song 'If I could turn back the hands of time'. All di same yute, if a bad man tings yuh inna, yuh haffi suffer bad man consequence. But Jah know it sad.

Even Sadder!

Look, this is di first and last time mi a guh chat bout Peter Lloyd cause him nuh worth it! But people si di Press Release him send out yah:

PETER LLOYD SHINES AT STING

"Peter Lloyd delivered a solid and professional set at Sting 2004. He was well received as the audience danced, sang and held lighters to his hit singles Concrete Jungle, Ready 4 Luv and U Magnet. Lloyd's short and very energetic set was further infused with the inclusion of fast-rising dancer Ding Dong. Sting's traditional tough audience was receptive to Peter Lloyd. This caps off a great year for the artiste and indicates great things for 2004."

Mi nuh change nutten, mi nuh add nutten. Show yuh how fi him career pap dung, him perform at a show whe nuh happen yet - Sting 2004!

Di world's greatest!

L.A. Lewis, mi nuh know how yuh do it! But yuh great! Yuh nuh have not one song whe anybody can remember, yet everybody know yuh name! Boss man, yuh great. Unnu never see L.A Lewis end up inna picture at Kartel press conference! How him do it, mi nuh know. But some a unnu deejay whe need management need fi guh find him. In fact mi a start one company dis year, and mi a guh hire him as mi marketing manager! Yute yuh large out deh!

Marshall need

fashion help!

People, unnu did si Wayne Marshall a STING? Mi seh di yute look like him grandmother patchwork bed spread vomit pon him jeans! Mi seh mi nearly dead when mi see di sinting! Mi a beg yuh Marshall, mi a beseech yuh, get a new designer, do! Di look not looking good man, it not looking good.

Anyways mi gone yah, mi need fi guh sleep offa dah headache yah! Next week!